Komnidade sira ne’ebe maka hela besik edifisiu Polisia Nasional Timor Leste (PNTL) Kaikoli, Dili hasoru Komadante jeral PNTL hodi ejije sira nia direitu ba aihoris ne’ebe maka sira kuda durante tinan barak nia laran no ikus mai hetan estragus hosi parte seguransa sira. Tanba ne’e komunidade sira ejiji PNTL tenke selu Indiminizasaun ba Komunidade nia Aihoris.
Tuir Rosa da Silva katak, sira hela iha rai ne’e laos foin maka hela maibe, sira hela iha rai ne’e durante tinan 1992 tempu Indonesia nian too agora, no durante ne’e sira moris liu hosi kuda modo no kuda aihoris nebe maka bele fo benefisiu ba moris, hanesan kuda modo tahan hudi, nú hodi ba faan , no liu husi atividade sira ne’e maka bele sustenta moris durante tempu Indonesia nian to’o ohin loron.
“Ami mai ejije ami nia direitu tamba ami nia aihoris sira ne’e PNTL tesi mos hotu ona no la fo liafuan ida ba ami, no ami hatene katak rai ne’e estadu nian, maibe aihoris sira nebe moris mai bot hotu ne’e laos estadu nian, maibe povu kuda maka nia moris mai ne’e, to’o ikus mai tesi la husu autorijasaun hosi ami nain, no ami hakarak sira ganti rugi netik ami nia hudi oan sira nee no nú nebe fuan hotu ona ne’e,”dehan Rosa da Silva ba Jornalista sira Segunda (07/09/2015) iha kuartel jeral PNTL.
Nia mos hatutan, ai horis sira ne’e laos foin kuda, maibe kuda deste uma ne’e hari, no memento halo uma iha ne’e rai fuik no nakonu ho tahu dodok tan ne’e maka moris ami nian ne’e liu hosi fa’an modo tahan maka suporta uma laran.
Iha fatin hanesan Juliana Martins hanesan komunidade ne’ebe hela kleur iha parte rerefe hatutan katak, sira triste tamba durante ne’e PNTL sira tesi sira nia aihoris tesi nonok deit no la husu autorizasaun ba nain sira nebe maka kuda.
“Ami hakarak sira tenke fo netik osan ruma ou ganti rugi ba ami nia ai horis sira ne’e, tamba durante ne’e ami nia moris defende liu ba aihoris sira ne’e, tamba ne’e ami mai atu hasoru Komadante Jeral hosi husu ami nia diretu ba aihoris sira ne’e no sira ganti rugi ona maka foin ami bele sai hosi fatin ne’e no ami mos hatene katak rai neebe ami kuda ai ba ne’e rai estadu nian, no ami pronto atu sai,”informa nia.
Hatan ba preokupasaun ne’e Komadante Jeral Polisia Nasional Timor Leste PNTL komisariu Julio da Costa Hornay informa katak, parte PNTL halo ona dialogu ho komunidade sira ne’e, no fo bebeik informasaun atu nune’e komunidade sira ne’e bele muda ses hosi fatin atu nune’e ema bele hahú halo edifisiu PNTL nian.
“Ami hateten bebeik ona ba sira, tamba rai neebe sira hela ba ne’e rai estadu nian, tan ne’e husu sira atu sai ona, atu nune konstrusaun ba Kuartel Jeral bele hahu ona, tan nee komando sei buka meus atu bele rejolve lalais problema sira ne’e,”informa Komisariu Julio Hornay. Nes
Jornal Nacional