DILI - Tribunal Distrital Dili (TDD) seidauk halo mandatario ba rekursu arguidu Joao Cançio, hodi hatama ba iha Tribunal Rekursu (TR) tanba sei ferias judisiario.
Tuir offisial justisa neebe la temi naran hatete, rekursu Joao Cançio nian tama ona iha secsaun krime TDD nian, maibe seidauk halo mandatario tanba sei iha hela ferias nia laran, depois tama fali mak foin halo mandatario hodi haruka ba iha Tribunal Rekursu.
Ami simu ona husi parte advogadu arguidu nian, maibe seidauk iha mandatario para haruka ba iha TR. Depois ferias mak foin halo mandatario ba iha TR. Kona ba saida mak hatete iha rekursu nia laran so parte defesa mak bele esplika klean, ami so bele koalia kona ba jeral nian deit,” dehan nia ba STL iha TDD, Tersa (08/09/2015).
Oras nee rekursu nee sei prosesu hela iha parte seksaun krime nian. Depois seksaun krime hatoo ba iha juis prosesu mak foin halo mandatario ba tribunal neebe as. Iha loron 20 Jullu TDD aplika pena prizaun tinan 7 ba arguidu Joao Cançio no selu indimizasaun ba estadu ho valor rihun $500. Enkuantu arguidu Tarsisio do Carmo tama kadeia tinan 3 fulan 6 no selu indimizasaun ho valor rihun $200.
Iha audensia julgamentu tribunal lee sai leitura akordaun katak, Ministeriu Publiku akuza arguidu Joao Cançio ho Tarsisio ba krime partisipasaun ekonomio em negosio tuir artigu 299 kodigu penal TL. Faktus husi MP nian provadu hotu, arguidu nain rua partisipa direita ba faktus neebe mak MP akuza. Informasaun kompletu iha STL Jornal no STL Web, edisaun Kuarta (09/9/2015). Domingas Gomes
Suara Timor Lorosae